有些陷阱你可以避，有些卻避無可避，好似成街成巷的假藥，真係唔講都唔知，原來死神離我們很近。市面上假藥充斥，據悉近三年內，當局檢獲的冒牌藥物總值便高達二千多萬元。有調查發現，近兩成一病人曾購得假藥，四成曾購得懷疑假藥。

鬼咩！政府草菅人命，拖延多年的藥物監管條例遲遲不落實，病人分分鐘毒死多過病死。高官淨係識耍太極，又話人手資源緊絀，又話即使立例都難堵截水貨，即係話你死你賤！總之，活在香港，一步一驚心！買傷風藥變咗買假壯陽藥，有可能令你死得很冇尊嚴——生前軟弱，死後卻硬起來！

荷里活災難片《2012》又嚇我哋：二○一二年世界末日，地核逐漸融化，火山爆發，海嘯撲面而來。美國《發現》雜誌曾評出二十一世紀威脅人類生存的二十大危險，其中小天體撞擊地球位於首位。科學家話，目前已知對地球威脅最大的近地小天體是「阿波菲斯」小行星，其直徑約為四百米，一旦撞上地球，將釋放出比廣島原子彈高十萬倍的能量。

老朽這把年紀實在不堪再嚇，但活在香港想死話咁易，行出旺角、銅鑼灣，鏹水彈令人喪膽；路過沙田，說不定撞正「小李飛刀」；去屯門訪友，遇大鐵錘先問候！