香港廠商聯合會會長尹德勝兩星期後卸任，一班會董尋日筵開九席齊齊幫佢Farewell，尹會長口才了得，趁機來個「棟篤騷」，細訴喺商會打滾三十載感受，仲變身「Ｋ歌之王」高唱一曲《朋友》答謝支持，多位副會長包括施榮懷、林大輝、羅富昌等人跳上台做「陪唱」，歌喉似模似樣。
尋晚一向飲得嘅尹會長竟然滴酒不沾，自爆一個月前「生蛇」，位置喺頭上，痛到飛起，點知康復後輪到牙痛發作，杜完牙根後又發燒，「病魔」連番作怪令佢無晒癮，不過尋日見到賓客滿堂，興奮到滿場飛，仲趁機多謝坐喺台下含情脈脈望住佢嘅尹太霍淑儀。
尹會長話擔任會長兩年間工作浪接浪，冷落咗嬌妻，好彩老婆體諒，十二月尾卸任後，佢會同太太遊美國洛杉磯作補償，順便探望移居當地嘅仔女及孫兒。休息過後，尹會長將「升呢」做廠商會永遠名譽會長，專注搞商會嘅智庫「才略工場」。