本文重點
尋日係立法會議員梁劉柔芬（Sophie）與丈夫梁孔德嘅細仔梁麒繕（Jeffrey）同女友黎美儀（May）結婚大喜日子，梁家喺中環四季酒店舉行結婚酒會及晚宴，政商界猛人車輪轉出席撐場。Sophie兩公婆笑到見牙唔見眼，梁孔德更大搞棟篤笑，聲言細仔婚宴後，屋企盛事告一段落，除非Sophie批准佢喺外邊搵多個喎！
政商名人齊撐場
Sophie交遊廣闊，搞喜慶事自然好多人到賀，好似新世界發展主席鄭裕彤、長實集團副主席李澤鉅、合和實業主席胡應湘夫婦、英皇集團主席楊受成、玩具大王蔡志明夫婦、協成行集團董事總經理方潤華及兒子方文雄、港鐵行政總裁周松崗、中策集團主席馬時亨等。赴宴嘅局長有林鄭月娥、孫明揚、鄭汝樺、劉吳惠蘭及張建宗等，議員主要為建制派，前黨友、自由黨嘅田北俊及方剛都有現身。
身為足總主席嘅梁孔德話，今年有兩件開心事，第一件係香港足球代表隊勇奪東亞運金牌，對自己嚟講係份好大賀禮。第二件更開心嘅事就係連細仔都成家立室。今年只得廿八歲嘅Jeffrey，原名叫梁鎮宇，○七年下半年改名為梁麒繕，早前喺紐約哥倫比亞大學畢業後，在硅谷任職電腦程式工程師，○六年初返香港發展，曾任職華置助理銷售及租務經理，現為專業物業投資者；個仔尋日成家立室，Sophie同梁孔德終於安樂晒！
