本文重點
醫管局主席兼智經研究中心主席胡定旭食盡好嘢，如果要他選最愛食品，相信會係燒肉，事關當年他到英國讀書，思鄉到要自製土法燒肉送飯。講到靚燒肉，今年米芝蓮推介嘅深水埗「容記小菜王」係其中一間，話說三年前肥胡已知道呢個架步，但無時間幫襯，直到最近佢嘅智經之友、「政壇新星」深水埗區議員鄭泳舜約食飯，終於有機會試菜。
難得肥胡大駕光臨，老闆易偉容特別寫張「九大簋」菜單，包括肥胡最愛嘅靚燒肉、古法頭抽蒸好好魚、宮廷滋補靚湯、天下第一雞等九道菜。燒肉係用新鮮豬腩肉，肥瘦相間皮又厚，香脆又鬆化，肉汁豐腴，難怪肥胡都話皮脆肉嫩，歎埋其他上等菜式，當堂食到舔舔脷，大讚名不虛傳。如果要歎咁美味嘅菜式，代價係每人三百元。
傳鄭泳舜戰九龍西補選
講番今次幫肥胡拉線食好嘢嘅鄭泳舜，其父親為保良局副主席鄭錦鐘，他在○七年以廿八歲之齡參選深水埗區議會南昌北選區，擊敗民協資深區議員梁欐，今年進身政黨教育政策副發言人，並加入智經之友，成為新一代政壇新星。最近泛民主派「五區總辭」打得火熱，鄭泳舜被傳出有機會出戰九龍西補選，政途無可限量。
卓妮