亞洲保險總裁陳智思（Bernard）含着金匙出世，照計食嘅用嘅都唔使計過度過，要幾豪有幾豪㗎啦。不過原來Bernard都幾有獨特品味，佢心中至愛嘅腕錶竟然係四百幾元嘅Timex運動休閒型電子膠錶，幾十年嚟對呢個牌子都不離不棄添！
早前喺亞洲保險五十周年酒會咁隆重嘅場合，Bernard都係戴膠錶出場，無話特登去買隻奢華嘅靚錶嚟襯托吓身份。佢話屋企仲有幾隻Timex唔同款式嘅手錶，即使爛咗都會買番呢個牌子。問佢點解鍾意，佢淨係識得笑話：「就係鍾意！」卓妮都同意，鍾意一樣嘢係唔需要理由嘅。
大家咪以為平無好嘢，其實Timex有百年歷史，係全美最暢銷運動休閒手錶，好多明星名人都愛不釋手，總統級嘅fans有甘迺迪、克林頓，性感尤物莎朗史東、實力派演員羅賓威廉斯都係超級粉絲！
卓妮