由唔少名人二代做骨幹嘅青聯，暑假幫大學生搵工，之前又展示全球最大國旗，下個月又有常務副主席葉振都領軍嘅政改研討會，會務相當忙碌。不過咁，勤有功，戲都有益㗎！前晚主席陳仲尼（Rock）帶埋太太區海倫同朱鼎健、霍震霆嘅公子霍啟剛同啟山、楊受成孻仔楊政龍、邱德根孻仔邱達根及孫女邱詠麒、李運強細仔李文彬、許晉亨外甥郭永亮、羅家寶愛女羅穎妍、詹勝等出席，仲有中聯辦及政府官員出席，卓妮都去咗湊熱鬧。

朱鼎健盡興 不忘行善

身為主人家嘅阿Rock好細心，同太太分坐主家席兩邊，等所有嘉賓都可招呼得到，Rock太區海倫就充當攝影師幫老公影相，認真唔話得。至於以青聯為家嘅前主席曾智雄幾乎由頭坐到尾，同之前買天匯一夜成名嘅青聯副主席秦善文兩「兄弟」周圍敬酒，不過酒量麻麻嘅秦善文，忍唔住叫埋啟剛一齊玩敬酒，大家老友鬼鬼，唔係好愛飲嘅啟剛惟有陪佢四圍走。Party仲有抽獎、啤酒競飲、估歌仔等遊戲，結束前更上台唱會歌，眾人玩得相當投入。

全晚最high要數Ken，唔好誤會，佢唔係飲high咗，只係做善事做到興奮啫，話說Ken即場宣布捐六萬八畀賢慧社，支持佢哋嚟緊四月同班平時無乜機會去海洋公園嘅小朋友去玩番日，連玩都不忘做善事，難怪賢慧社召集人、港協暨奧委會秘書長彭冲嘅愛女彭芷君錫晒佢。

至於李文彬就成晚陪住太太Amanda出出入入，睇真啲，原來李太有身孕，仲要嚟個孖胎好事成雙，真係恭喜恭喜！第一次做爸爸嘅文彬話要好好答謝太太，所以知道太太有喜後，不停向太太送禮物，嚟緊仲要陸續為太太送上驚喜，氹得Amanda笑逐顏開。

李文彬對懷孖胎嘅太太呵護備至，二人坦言初為父母，心情緊張。 （楊歡成攝）	楊政龍（左一）初試啼聲表現淡定，仲話自己嘅戰場在香港，不在美國；圖為佢與青聯主席陳仲尼伉儷（中、右二）、會董江欣庭（左二）等來個合照。	朱鼎健（中）自揼心口捐六萬八千元，支持青聯女將組成嘅賢慧社做善事。

楊政龍加入 如虎添翼

前晚卓妮仲見到個新面孔，就係英皇集團主席楊受成孻仔楊政龍（Alex），今年廿三歲嘅Alex，喺美國讀咗八年書，啱啱返港五個月，依家喺家族嘅英皇集團做企業行政官，雖然Alex有啲怕醜，不過對答頭頭是道，仲要兩文三語都好流利，早前Alex去咗北京參加國情研習班，佢話全程普通話都沒問題；問佢在哪裏學國語，Alex好謙咁話要多謝當年喺美國有個台灣同房，先練出咁流利嘅國語。睇嚟青聯有咁好嘅新血加入，真係如虎添翼！

卓妮