17/12/2009

播放本新聞相關短片

政情:鐵頭仁普選緊要過抱孫?

白鴿黨呢期新聞多多,不過無一單係好事,先有立法會議員甘乃威「示愛事件」,繼而有公民黨、社民連落力逼佢哋坐上五區總辭頂轎,相信身為黨主席嘅鐵頭仁何俊仁嘅心情,定必好似一首歌嘅歌名咁:「最近比較煩」!好彩下個月佢就有喜事臨門沖喜一下,就係佢位大女出閣。

尋日喺立法會上見到鐵頭仁,面上展現出好耐無見嘅笑容。一問之下,原來鐵頭仁快將嫁女,女婿從事金融業,係新娘子喺加拿大讀書時嘅同窗。

鐵頭仁爭取民主幾十年,今次係何家第一單喜事,究竟鐵頭仁想普選先?定係抱孫先呢?鐵頭仁笑住話邊有咁快抱孫呀,一對新人下個月先結婚,況且唔係話生就生,唔通鐵頭仁心底裏始終想普選先過抱孫?咁就真係佢自己先知啦!