現時建制派中對總辭補選最亢奮嘅係民建聯，磨拳擦掌，未等教練示意，已經做定熱身等落場，以目前形勢睇，三區大局初定，就係港島、九龍西同九東，港島外圍睇好張國鈞，九龍東、西則已有人選，未有定案。不過，最終花落誰家都好，形勢點都簡單過新東同新西。

暗中較勁未傾掂

新東民記想出劉江華愛將葛珮帆，但係上年選過嘅龐愛蘭，據聞至今仍然好想捲土重來，佢上年憑一人之力攞二萬票，應該有人背後力撐，唔到民記想點就點。不過，民記對參加補選卻似乎事在必行，認為選舉靠選舉機器，點秤都輪唔到非親非故嘅龐愛蘭擔大旗，依家兩邊暗中較勁，外弛內張，最後唔知點收科。

一齊出戰仲麻煩

新西形勢一樣複雜，民記極想派新人陳恒鑌練兵，但係新西係建制派除九東外第二個最有希望擊敗泛民奪取議席嘅選區，田二少無理由拱手相讓，而走去港島或者九西被泛民祭旗，預料自由黨呢鋪點都要同民記鍊到底。唔協調、一齊出戰又點呀？咁咪麻煩囉，建制派贏面細咗都係小事，不利建制派團結嗰吓緊要吖嘛，五區民記玩晒，自由黨會點諗先。

自由黨上年選舉重挫之後，已經一度向反對派路線傾斜，對特區政府嘅跛腳鴨管治造成困擾，難得建制派最近表面和諧番啲，唔通由佢再散過？依家正值政改之戰前夕，有關方面點會唔考慮？

自由黨主席劉健儀尋日話，補唔補選由田二少決定，即係話自由黨押注田二少一人，雖然劉健儀補充，二少區區都有機。不過，佢講漏一句，就係先決條件係建制派無其他人出嚟分票。葉劉淑儀則透露，史泰祖無意選港島；工聯會黃國健則指，嫻姐傾向唔出戰，睇嚟五區補選建制派真係只有新東同新西最亂喎。