前晚喎，大批群眾喺大球場見證香港足球隊歷史性贏得東亞運冠軍，你以為吐氣揚眉啦，你以為普天同慶啦，你以為十二月十二日會成為「香港足球勝利紀念日」啦，點不知，散場之後球場附近嘅銅鑼灣駱克道行人專用區居然有人將裝有腐蝕性液體嘅膠樽掟落街，造成六名無辜市民受傷。同一個十二月十二日，又成為「鏹魔行兇周年紀念日」。

一年前嘅十二月十三日，旺角西洋菜街行人專用區有人連掟兩個鏹水彈，導致四十六人受傷。周年前夕再有類似事件發生，到底有乜嘢特殊含意呢？究竟係咪同一人所為？功夫茶雖然唔係犯罪學家，不過根據表面迹象睇嚟，鏹魔來來去去都係一個人嘅可能性非常之高。喂，案發現場同樣係行人專用區，投彈平台如無意外又係不設防嘅舊樓，再加上周年前夕施襲，稍有常識嘅人都會諗，九成係同一隻冷血魔頭所為啦！

嗱嗱嗱，大家唔好怪功夫茶翻舊帳，一年以來擲鏹事件已經發生過接近十次，旺角固然係重災區，深水埗亦係空襲熱點，家陣輪到銅鑼灣遭殃，警方一次又一次表示不惜一切嚴肅處理，甚至不斷加碼懸紅緝兇，點解咁耐都破唔到案嘅呢？點解兇徒仲可以逍遙法外嘅呢？警方被剃眼眉事小，市民危危乎事大，唔通真係行騎樓底戴鋼盔咩！

曾蔭權尋日去到銅鑼灣案發現場視察，一方面譴責兇徒所為令人氣憤，另一方面又話，明白緝兇唔容易，但必定會盡一切能力破案，責成警方從速將鏹魔捉拿歸案。

話時話，唔止兇徒所為令人氣憤，警方嘅表現同樣令人氣憤。大家都知啦，警務人員前一排嘈喧巴閉揚言示威爭取福利，結果如願以償逆市加薪，人工就加咗嘞，捉賊有冇醒咗？唔覺囉，否則銅鑼灣唔會變成雞飛狗走嘅人間煉獄。

按照行兇模式睇嚟，鏹魔家陣採取打游擊政策，你喺旺角安裝天眼咩，佢過海去到銅鑼灣作惡。唔好怪功夫茶烏鴉嘴，下次話唔定係蘭桂坊，再下次有可能係油麻地，然後全港十八區輪番施襲，總之無一樂土心慌慌。

講咗咁耐，功夫茶無非係想講幾句肺腑之言，差人叔叔呀差人叔叔，為咗閣下嘅眼眉着想，為咗煲呔曾嘅面子着想，更加為咗全港小市民嘅命仔着想，唔該認真少少，麻煩肉緊啲啲，火速破案啦，唔好嘥米飯！