本文重點
「欄王」劉翔上星期五以輕鬆姿態贏得本港東亞運動會百一米欄賽事，下午稍作休息後，傍晚應好友古巨基邀請到尖沙咀圓方利苑食晚飯，當晚菜式含豐富骨膠原、蛋白質、鐵質及鈣質，包括古方燉蘇眉煙斗骨、陳皮葱花蒸唇髻及濃湯過橋加拿大象拔蚌。所有菜式都唔平，其中蘇眉煙斗骨每碟盛惠近八百蚊。
煙斗骨養顏補關節
利苑酒家經理曾鋒話，古方燉蘇眉煙斗骨燉湯營養豐富，用天麻、川弓及白子等藥材燉六十斤重嘅蘇眉煙斗骨（脊骨），幾種藥材好處係去頭風和通血脈，煙斗骨就含豐富骨膠原，有助養顏和補關節。至於陳皮葱花蒸唇髻，即係蒸蘇眉嘴唇，亦含有豐富骨膠原，連同燉湯補上加補。講到濃湯過橋加拿大象拔蚌，含豐富蛋白質、鐵質及鈣質，有助修補肌肉同強化骨骼，仲唔係為劉翔度身訂造？
卓妮