全國政協委員、東海聯合集團主席黃楚標在中港兩地生意瓣數多多，工作之餘亦好識享受人生，閒時約埋三五知己打高爾夫球聯誼外，還鍾情賽馬。標哥近年先後買入六匹馬，惟大部分已退役，目前只剩下一匹「東海先鋒」，所以他今日會出席沙田馬場國際馬匹拍賣會競投新馬，為穩陣起見，前日親自入馬場「睇辦」，成功覓得心頭好。
標哥前日下午坐住部過百萬元嘅天皇級座駕豐田Century入沙田馬場，雖然部車出廠已有九年，但外觀保養得相當簇新，最煞食係掛上一個「1993」嘅靚車牌，令人眼前一亮。標哥笑笑口話，入場主要係預覽拍賣馬匹，準備今日競投一匹以填補早前退役嘅「青蝠王」。
今年廿一匹拍賣馬之中，標哥睇中兩匹新西蘭兩歲馬，成本價分別約為一百一十萬元及一百七十萬元，他預備用二百至三百萬元競投其中一匹，投得後希望交由練馬師方嘉柏訓練。退役嘅「青蝠王」過去都係方嘉柏訓練，總共為佢贏得六百多萬獎金，難怪標哥對柏廐投下信心一票！