香港專業及資深行政人員協會會長容永祺率領嘅名人南極探險團，上周浩浩蕩蕩出發，過去幾日已途經南非，轉機阿根廷逗留兩日，再前往阿根廷最南端城市、稱為「地極盡頭」嘅Ushuaia登上南極探險船，預計今日抵達南極展開探險之旅。容永祺話，一切食住同大解小解都在船上搞掂，免得打擾啲企鵝、海獅和海狗。
名人探險團抵達Ushuaia時已興奮不已，一行人包括駿豪集團副主席王英偉、全國人大代表羅范椒芬及夫婿、胡曉明夫婦等團員，隨即在印有Ushuaia地名嘅牌匾下作「到此一遊」式合照留念，男士穿着鮮黃色羽絨加風褸，女士們則着鮮紅色，一紅一黃相當搶眼，唯獨極地探險家李樂詩着咗件私伙黑色Fleece，而王英偉太太亦戴多個黑色冷帽保暖。
大合照後，容永祺隨即將合照連同一張前往阿根廷飛機途中影下嘅安第斯山脈相片，透過電郵傳送畀我哋，兩幅相由南極傳到香港，幾乎遊咗大半個地球，好難得！