全國人大常委范徐麗泰為中港兩地政界大紅人，甚至成為內地國家級旅遊景點嘅免費代言人。話說上屆港區人大在○六年七月到安徽考察，順道到黃山遊覽三天，當時擔任人大代表兼立法會主席嘅范太，在遊覽鮑家花園風景區期間曾與歙縣縣委書記滕祁源合照，其後呢幅合照就懸掛在風景區當眼處，與其他名人照片一齊做生招牌免費宣傳。
范太尋日向我哋話，佢去過嘅地方，好少會再去，所以唔知自己幅相被人用來做宣傳，但就算係都無乜所謂喎。咁又係嘅，范太多年來走遍大江南北，與內地省市官員合照留念多不勝數，相信不少旅遊景點都會學鮑家花園咁做。鮑家花園原為清乾隆及嘉慶年間嘅著名徽商鮑啟運嘅私家花園，滿布徽派盆景，係目前最具特色嘅徽商貴族花園。
講起黃山之行，范太至今仍然記憶猶新，事關係佢最後一次與已故人大代表鄔維庸到內地考察。佢憶述，當日上到黃山，雖然陰陰天，但慶幸無落雨，一陣風就將煙霞吹散，山峰美景盡收眼底，能感受「山在虛無縹緲間」嘅意境。