民主黨立法會議員甘乃威涉嫌求愛不遂怒炒女助理風波發展至今兩個月，女主角王麗珠被捲入漩渦，寧靜生活一夜打破，睇番成件事，王麗珠由始至終都被四個字牽累，就係「遇人不淑」，負心消防員前男友唔使講，遇上「脾氣暴躁」嘅上司甘乃威亦係不幸，事件發展最令人意外嘅，係本來同一陣線嘅立法會議員譚香文，三番四次向傳媒證實傳聞，變相揭佢私隱，愛佢變成害佢。
王麗珠無端端做咗新聞人物，聽講佢為避騷擾，連手機電話都改埋，舊同事、朋友甚至部分親戚都聯絡唔到佢，更加唔好話搵工重過新生活，睇嚟事件一日未告一段落，王麗珠都會繼續隱姓埋名，不過，啱啱先至有人向傳媒爆料，指佢誤交已婚消防員，睇嚟風波仍會沒完沒了，而譚香文呢個王麗珠代言人身份，亦可能會愈嚟愈鞏固。
接受訪問 透露細節
早喺甘乃威涉嫌「求愛不遂」事件曝光之初，譚香文已經接受傳媒訪問，喺未經王麗珠同意下，證實事件真確同王麗珠嘅身份，仲透露部分案情細節，令王麗珠大為憤怒，敕令佢收口。當時，已經有學者指，譚香文咁做，對女事主嘅傷害隨時仲大過事件本身。
被指大口 一度封嘴
譚香文被指大口，不知不覺變身呢單「桃色新聞」女配角，於是一度封嘴，已經有一段時間無介入事件，點知日前王麗珠曾經戀上已婚消防員嘅消息公開，譚香文「爆料」熱線再次開通，向傳媒證實傳聞之餘，更加交代埋消防員不但已婚，仲有女兒嘅細節，又透露曾多次陪王麗珠到警署落口供，其中一日係六月八日添，令傳聞內容更加豐富，記者梗係多謝佢啦，不過，王麗珠會點諗，就真係好難講。
有政界人士話，其實，王麗珠喺今次事件，已經承受好大壓力，譚香文為幫王麗珠，公開事件細節，就好似揭開王麗珠嘅傷疤，對王麗珠嚟講，真係未必可以受落，譚香文最好都係搵王麗珠溝通溝通吓好啲。