本文重點
曾入選全球十大知名酒店嘅半島酒店，尋日慶祝八十一歲大壽。大老闆米高嘉道理爵士趁生日湊吓MINI Cooper熱，訂製兩部全球獨一無二嘅「The Peninsula MINI Clubman」，不過部車唔係自用，而係接載半島貴客Shopping，聖誕節開始公諸同好。
有新車落地，米高嘉道理尋日朝早拖埋太太Lady Betty Kadoorie剪綵兼開香檳。部「Peninsula MINI」恍如米高嘅Baby，因為係由佢出馬搵寶馬集團高層一齊構思，車種屬MINI Cooper S Clubman系列，車身採用半島車隊專用墨綠色，加埋車頂可擺放物品嘅行李箱及後座部迷你雪櫃，麻雀雖小，五臟俱全，難怪米高嘉道理見到新玩具愛不釋手，第一時間跳上去試坐。
租套房免費兜風
半島車隊本身唔嘢小，已有十五架勞斯萊斯，用嚟載客人來往機場，不過每程要畀千二蚊，今次呢部「Peninsula MINI」就免費嘅，只要你畀六千八蚊租住半島套房一晚，就可以坐車兜風三粒鐘。
米高嘉道理擴充車隊有原因，佢出名係超級車迷，收藏多部古董車、ＢＭＷ及賓利（Bentley），平日鍾意自己揸車穿梭鬧市。米高嘉道理太太Betty就鍾情扮靚靚，尋日一身名牌出場，手上戴著名品牌Bvlgari手錶外，手挽矜貴鴕鳥皮手袋，老闆娘風采，果然名不虛傳。
卓妮