至於另一個聞風喪膽鬼見愁嘅專員，就係申訴專員嘞。如果你係公務員或者部分公營機構員工，一個唔好彩畀鐵面無私嘅專員申你一申、訴你一訴，你都幾頭痕。好似冇耐前之嘛，申訴專員狠批社署不負責任，審批傷殘津貼居然亂七八糟，事主明明斷左手，佢話人哋斷右手，更加無中生有評估事主完全失明。社署被揭發左右手不分、有眼當無珠，簡直無地自容瘀到爆。

大家知唔知，有一個雙料猛人，先後做過兩次專員？冇錯嘞，就係現任申訴專員黎年，佢之前做嘅係廉政專員。

尋日喎，黎年第一次以申訴專員身份出席立法會，有議員希望佢高調少少，加緊跟進被批評嘅政府部門。你估黎專員點回應呢？佢話喎，上任八個月以來，已經舉行過三次記者會批評部分政府部門行政失當，不過佢話自己鍾意實事求是，唔係咁鍾意「做大戲」。然後，黎年又話，唔能夠迫令行政失當嘅部門限時改善，但係對於屢勸不改嘅部門，會向行政長官反映。

吓？原來公務員係可以屢勸不改o架？原來係唔能夠迫令佢哋限時改善o架？頂多向行政長官告御狀o架咋？咁就真係死火嘞，申訴專員一向喺功夫茶心目中高大威猛嘅形象，開始有少少動搖。

你知啦，公務員最叻就係陽奉陰違，表面上批評接受，轉個頭一切照舊。你本來大概會以為，輿論批評就話可以當耳邊風啫，申訴專員批評冇可能闊佬懶理啩。殘酷嘅事實竟然係，真係可以懶理o架！

呢鋪大劑嘞，申訴專員只係有權開炮批評，冇權迫令改進，如果你係打滾官場幾十年嘅老油條，你一定會對所有炮聲隆隆嘅批評嗤之以鼻：我係不負責任，我係屢勸不改，你吹得我脹咩！

話時話，向行政長官告御狀到底有冇用？可以咁講，冇用又死，有用又死。如果話告御狀冇用，即係失職庸官樂逍遙；如果話告御狀有用，即係制度失敗玩人治。喂，對付失職庸官居然唔係靠制度，而係要睇行政長官一個人臉色，你話唔係人治係乜？

講到呢度，專員嘅江湖地位原來都唔係想像之中咁至高無上o架咋。不過無論如何點都好，申訴專員一定勁過私隱專員，點解？審計報告揭發私隱專員浪費公帑囉，申訴專員暫時都算大公無私。