立法會今日表決係咪調查民主黨議員甘乃威嘅示愛風波，保險界立法會議員陳健波尋日同傳媒表明贊成調查，希望可以還甘威一個清白。點解佢會咁同情甘威呢？原來佢都試過向女下屬示愛，仲開花結果添。
波哥後生時喺銀行分行打工，日日忙到飛起，夜晚又要去進修考保險牌，完全冇時間識女仔，最後惟有喺分行內搵對象，最終成功搵到當時比佢低一級嘅陳太。
對於好多人反對辦公室戀愛，波哥就大唱反調，話喺同一間公司做嘢，好快就知晒對方嘅缺點同真面目，唔怕娶錯老婆嫁錯郎。不過當年佢為免公司有微言，都同太太搞咗一排地下情，到最後畀同事撞破，先被迫將戀情曝光。
波哥下個星期三會喺立法會提出動議，要求政府推動工作與生活平衡嘅新職業文化，例如畀多啲時間員工做運動、進修、湊仔、甚至拍拖，不過就唔包括鼓勵辦公室戀愛，以免引起爭議令動議泡湯。