新立法會綜合大樓有排都未落成，不過要終日喺立法會開會嘅議員都好緊張大樓有乜設施，所以發展事務委員會尋日就召開特別會議，由立法會秘書長吳文華（Pauline）親自講解新大樓耗資九千九百萬元嘅資訊科技系統。
現時立法會會議只有部分電視台直播，公眾只可於會後上網聽番會議內容，不過有聲冇畫，非常沉悶。Pauline話，新大樓會設立電視製作中心，網上即時直播各個會議，就連翻譯系統亦都會數碼化，所以議員日後要搵番自己嘅發言就會更加容易。
依家大部分嘅傳媒都會喺網頁內設即時新聞，每日都有咁多重大法案、政策要喺立法會討論，所以立法會都會與時並進，喺網頁加插即時新聞。
另外，資訊科技界立法會議員譚偉豪（IT豪）除咗關心大樓內嘅設施外，仲幫門外示威人士諗埋。佢話，依家議員要落去接信先知請願內容，所以建議秘書處網上直播示威區情況，而且仲建議設立網上示威區，等唔可以親自前往立法會嘅市民都有渠道表達意見。Pauline聽到IT豪嘅建議，即時點頭讚好，仲承諾會作詳細嘅研究添。