人稱田少嘅旅發局主席田北俊個性率直，尋日佢應香港管理專業協會邀請，就保持香港旅遊業競爭優勢發表演說，席間有人問佢點樣推廣綠色旅遊，佢嘅答案，再次表露佢「有嗰句講嗰句」嘅性格。
話說政府大鑼大鼓咁慶祝爭取到國家地質公園，又將地質公園視為新旅遊項目，講到香港無懼周邊競爭咁，點知田少直話直說，直指地質公園巴士又唔去，的士入去又會罰，裏面廁所又冇，連買支水嘅地方都冇；如果要加呢啲設備，又會畀當地原居民同環保團體反對，當地人都唔會鍾意遊客去。唔怪之得田少話，雖然旅發局一定會將地質公園放埋落去宣傳工作度，但「吹水」啲嘢真係吸引冇幾多（旅客）！佢嘅講法，唔單止潑政府冷水，仲變相幫旅發局倒米。
講到香港酒店唔夠，田少又竟然話，係遊客都會揀在深圳房租一千蚊以下嘅酒店住，依家成日講一程多站，唔好只係睇香港酒店數字，如果深圳房間數量足夠嘅話，相信可以搶走不少外地遊客。佢仲好坦白話房租六百至八百元價嘅酒店都仲有空間加房，但去到二、三千蚊就唔係好需要，唔知業界會唔會同意呢？