港隊代表王史提芬喺東亞運ＢＭＸ單車賽勝出，從專程到場打氣嘅港協暨奧委會會長霍震霆手上，取得港隊同今屆東亞運嘅第一金，多少令某啲原先對東亞運毫無興趣嘅香港人開始改觀。

知情人士話，呢場比賽其實係小霍精心策劃嘅一場公關騷，睇準外號「ＢＭＸ天王」嘅王史提芬質素超晒班，除非好似上次全運會咁出現單車斷鏈意外，否則九成九可以奪金，因此小霍特別安排呢項賽事作為東亞運第一金，早到喺開幕儀式舉行前已比賽完頒獎，希望刺激港人慢熱情緒，認真用心良苦！

缺席即回復水準！

至於煲呔曾日前帶埋佢愛將財政司司長鬍鬚曾、食物及衞生局局長周一鑊同康樂及文化事務署署長馮程淑儀，到場觀看東亞運壁球女單決賽，仲親自頒獎畀奪得金牌嘅港隊代表趙詠賢，原來亦係小霍喺背後苦心安排，認定呢個金牌係港隊囊中物，先敢叫煲呔曾嚟捧場同頒獎。最後港隊亦不負小霍所望，決賽兩位選手都係港隊代表，誰勝誰負煲呔曾都有獎頒。

不過民政事務局局長曾德成同政務司司長唐英年就冇咁好彩，前者去咗睇港隊代表傅家俊嘅男子英式桌球單打八強賽事，心諗「神奇小子」有望奪金，點知傅家俊最後爆冷輸咗畀名不經傳嘅廿二歲國家隊代表于德陸。不過傅家俊之後喺德成局長缺席下，就立即打出應有水準，帶領港隊勇奪男子英式桌球團體賽金牌，真係咪話唔信邪！

唐唐喺同日亦去咗捧國家女子籃球隊嘅場，國家隊喺上半場仲領先對手日本隊兩分，點知下半場形勢大逆轉，最後爆冷倒輸五分。好彩呢場只係初賽，國家隊最後都成功入到第二圈，尋日仲咁啱喺準決賽遇番日本隊，喺冇特區高官到場打氣下，終於一雪前恥以兩分之差勝出，決賽十一日會對中華台北，希望到時唔會再有高官突然愛國心大發，仆倒去現場為國家女籃吶喊助威喇！