全程十分鐘毋須試衫

久違了嘅小恩子風采依然，薄施脂粉已見得人，天氣寒冷，小恩子出街都着番件長身羽絨褸，頭上戴副黑超做頭箍，闊太味濃。小恩子連環出擊，掃完意大利品牌Marni後，孭住戰利品轉戰St.John專門店。

St.John呢個品牌深得成熟優雅嘅名媛歡心，小恩子着呢個牌子，似乎早咗啲噃。睇真啲，原來小恩子係陪媽咪攞衫。黎媽媽手挽黑色Chanel手袋，貴氣十足，佢似乎係St.John熟客仔，店員一見兩人就殷勤招待，二話不說包起兩款貴氣套裝，一套全白色，另一套粉紫色，黎媽媽買衫速度快，連衫都無試就攞衫走人，全程只係十分鐘，快靚正！小恩子同媽咪都滿載而歸，笑住登上座駕離開。

講番St.John呢個品牌，今年嘅冬季套裝，起碼都萬三、四蚊一套，「美容教主」鄭明明都係St.John擁躉，去年上北京開兩會，明明姐帶備幾套St.John 套裝上去；前高官葉劉淑儀都鍾意St.John 啲衫，可惜每次去婦協活動都同闊太撞衫，惟有改着其他牌子嘞。

卓妮