喺中環四季酒店同尖沙咀帝苑酒店開店嘅稻菊，名人客眾多，除咗阿Rock，中策集團主席馬時亨都成日捧場，佢哋兩個鍾意同一間食肆，相信同大家都係愛家的男人有關。阿Rock以前好鍾意食刺身，但媽咪就叫佢唔好食咁多生冷嘢，所以佢依家唔熟唔食，首選係天婦羅；稻菊嘅天婦羅出晒名，尤其係「活蝦天婦羅」更加Ichiban，海老（蝦）在店內新鮮飼養，即席在客人面前捕捉、去殼，然後浸漿落鑊炸，火候恰到好處，皮薄唔油膩，入口鬆化，令人回味無窮。

阿Rock一對小朋友就特別鍾意食稻菊嘅燒粟米，同埋飲無酒精成分嘅果汁雞尾酒，太太就愛食宮崎牛，實行一間舖頭滿足晒咁多個願望。