喺街上撞到郵差叔叔送信一啲都唔出奇，之但係尋日喺海港城就出現咗一個行到邊都有大批閃光燈跟住嘅郵差，究竟係邊位郵差有咁大面子吸引到咁多記者朋友呢？睇真啲，原來係郵政署長張雲正！署長着成副郵差服裝究竟搞乜鬼？
原來署長今日係化身為「Postman of Love」，為香港郵政喺海港城新開嘅概念店主持開幕儀式。署長話，以前淨係着過童軍嘅制服，着郵差制服就真係第一次。佢仲笑笑口咁同我哋講，着住呢套制服覺得好有使命感，但係就「一步一驚心」，事關佢行嘅每一步、做嘅每一個動作都代表緊香港郵政嘅形象，所以要好小心先得喎。
署長話好想帶成班同事一齊嚟影相做郵票，原因係好想快啲利用呢個「愛心郵票」平台向大家推廣自己嘅郵政團隊。