本文重點
由富豪後代牽頭嘅「博鰲青年論壇」尋日喺會展揭幕，口才了得嘅國家前外長李肇星打頭陣發言，李肇星祖籍山東，佢嘅普通話帶濃濃北方口音，講嘢時口裏似含住一粒乒乓波，台下唔少嘉賓聽到頭都痕，恨不得有部即時傳譯機喺身邊，好彩李肇星談笑風生，聽得明幾成內容已經不枉此行。久未遊香江嘅李肇星對港人笑容印象深刻，話喺港人臉上，絲毫睇唔到金融海嘯嘅痕迹喎。
李肇星訪港，富豪後代爭睹其風采。午餐會上，論壇籌委會主席霍啟剛及菁英會核心施榮忻、盧金榮、莊家彬、洪為民、白富鴻等人輪流向李肇星及博鰲亞洲論壇秘書長龍永圖敬酒，又圍住李肇星合照，開心過見到四大天王，李肇星交際手腕了得，快快扒兩啖飯就轉身應酬「粉絲」。
鄧亞萍自嘲身形矮
個論壇採馬拉松式，發言嘉賓一個接一個，城大校長郭位及中國奧運金牌得主鄧亞萍亦上台發言。大會以「金融危機下的中國外交、經濟和文化」為題，講題海闊天空，但郭位就一針見血批評東方人文化教條太多，但做得少；現代人都將自己放得高高在上，唔識尊重別人，呢番話認真發人深省。
鄧亞萍就以身材問題作開場白，自嘲身形矮小，每次上台講嘢都驚個咪擺得太高，估唔到尋日大會連呢點都遷就晒佢，連佢都忍唔住讚句：香港人做事真係夠晒專業！