長期負責青年工作嘅國務委員劉延東日前旋風式訪港，除咗主持東亞運開幕禮，仲接見上百名香港青年團體新舊領導，其中幾位「老青年」伍淑清、霍震寰、王敏剛、李宗德、陳振彬以及百仁基金嘅李家傑等獲安排坐喺前排，香港青聯主席陳仲尼、前主席許華傑、副主席鄭志剛、朱鼎健以及施榮忻、霍啟剛等一班菁英會核心就企在第二排，大有交棒接力、長江後浪推前浪之意。

千字聲明希望理性討論

劉延東對香港青年團體提出三點期望，包括愛國愛港、興港建業同團結自強，顯示中央希望呢班青年人喺香港扮演更重要角色。雖然劉延東整個訪港行程隻字不提政制問題，但眼前急務係搞政改，所有建制力量都被發動起來撐政府，又怎能少愛國青年團體一份兒！喺劉延東訪港前兩日，菁英會率先喺報章刊登咗篇上千字聲明，話佢哋對政府政改方案都有唔少意見，例如質疑政府冇喺特首選委會增設青年團體同中小企界別等，但就話整體方案都係提高咗民主成分，有利香港循序漸進喺二○一七同二○二○年落實雙普選，希望泛民可以就政改內容作出理性討論，避免政制原地踏步等等。

陳仲尼盼政制向前邁進

尋日喺博鰲論壇見到菁英會政治研究會主席白富鴻，佢話菁英會遲啲仲會搞民調，了解唔同背景青年人對政改嘅睇法，但強調佢哋個個有獨立思維，唔會盲目支持政府。

我哋又喺博鰲論壇見到香港青聯主席陳仲尼及秘書長詹勝。陳仲尼話，佢個人支持民主發展，亦支持喺二○一七同二○二○年落實雙普選，因此佢最唔想見到香港政制好似○五年咁，再次錯失向前邁進嘅機會，原地踏步，佢希望大家把握，推動民主發展；不過，佢唔認為一定要增加青年團體嘅議席，但青年人可多參與政制討論。至於會否以香港青聯名義登廣告，或者搞其他政改活動，佢話絕對可以諗吓，不過要同青聯嘅兄弟姐妹坐埋討論再決定。