我哋早幾日先寫過，「示愛事件」女主角王麗珠日前發表聲明爆大鑊後，男主角民主黨立法會議員甘乃威喺網上人物搜尋嘅點擊率，仲高過美國總統奧巴馬。就連政界最近鬧得熱烘烘嘅五區總辭辯論，亦都因為今次事件而被迫押後，甘威今次真係威晒囉！
社民連議員黃毓民原定喺嚟緊星期三嘅立法會提出動議辯論五區總辭，但係自由黨劉健儀提出嘅譴責甘威動議同旅遊界謝偉俊提出嘅撤銷調查動議，都安排咗喺總辭動議前進行辯論同表決。有關動議原先已經估計會有唔少議員發言，依家多咗王麗珠份聲明，肯定會有更多人講嘢。
立法會秘書處日前就提醒班議員，叫佢哋要做好心理準備喺星期四續會，原定喺周四朝早舉行嘅部分委員會會議更加被迫改期。五區總辭動議排咗喺議程最尾，分分鐘要周四下午先至傾得完，畀甘威事件阻遲咗一日。