上一任香港科技大學校長朱經武贏盡「最佳大學校長」榮耀，新上場接任嘅科大校長陳繁昌難免有壓力，但佢就話「設法唔會（令自己有壓力）」，仲話要跟科大年輕力壯嘅學生哥打網球切磋兼聯誼，唔會認老，證明自己「仲有得揮」喎！
五十七歲嘅陳校長尋日喺一個電台節目上講明，一定唔會「鎖自己喺校長室」，會經常周圍走跟學生接觸，上場以來已經接見過學生代表、校友會代表，到過校園電台，但佢話仲要落埋Canteen（校園飯堂）接觸更大學生群，聽取學生意見，佢仲話依家都有定期做運動，跟後生過佢嘅同事打網球，佢就話歡迎各位學生哥約佢打波，合作玩雙打、比賽玩單打都無問題添！
陳繁昌留居美國四十年，今次返港發展，係因為以前一班皇仁中學的同屆舊同學，好似回歸前嘅保安司黎慶寧、中文大學醫學院院長霍泰輝等，個個有名望，又成為領導人物，搞到佢都心郁郁，決定返嚟出生地香港，作一番貢獻。