尋日發叔再次出手，不過今次就唔係去車公廟求籤，而係帶領一眾鄉議局高層同鄉民善信，為船灣岐山三宮廟主持拜神同開光儀式。三宮廟係指供奉關公關雲長嘅協天宮、供奉天后馬娘嘅天后宮同供奉孔夫子嘅孔聖宮。三尊神靈一位着重講義氣、一位保祐風調雨順、一個專講道德倫理，對於不斷出現內訌內亂、醜聞風波不絕、瀕臨道德淪亡邊緣嘅香港社會同特區政府，今次祈福活動真係好適切！

咁究竟發叔今次為香港市民祈咗乜嘢福呢？發叔致詞時透露，佢除咗祈求香港社會和諧、市民生活風調雨順等願望之外，仲特別提到希望政府為老百姓多做好事、多行仁政。咁即係話，特區政府冇做好事，亦行不仁之政喇，發叔作為行會成員，祈福嘅內容都算可圈可點。

彈起身避過一劫

發叔講完呢番說話唔夠幾分鐘，由主辦單位臨時搭建嘅主禮台地基，好似地陷咁成個向後冧咗一吓。其中見慣大場面嘅發叔同鄉議局副主席張學明都處變不驚，立即彈咗起身避過一劫。其他嘉賓就要連忙用手掹住張櫈仔，先至唔使跌到四腳朝天大出洋相。

今次小意外唔知係咪三聖顯靈，藉此話畀大家聽煲呔曾政府都係無藥可救、遲早陸沉。發叔兩度洩露天機踢爆煲呔曾嘅醜行，唔通暗示發叔都係盡快跳船，同煲呔曾劃清界線?!