一眾高官平日喺中環出入，假日則到其他地區找尋新鮮感。卓妮上星期日就撞到運輸及房屋局局長鄭汝樺（Eva），佢喺出trip前同家人到圓方嘅利苑酒家齊齊歎廣東菜，共享天倫樂。
啱啱新鮮出爐嘅米芝蓮指南，提及咗全港九間利苑酒家，其中五間有一粒星，圓方呢間係其中一間有星嘅，評為「價錢合理而美味」。呢度裝潢華麗，由不同嘅飯廳組成，其中一間仲有流水沿住水晶簾好似瀑布咁流落嚟，既宏偉又富時代感。
雖然利苑清一色食廣東菜，但佢哋以特別方法烹調出嚟嘅海鮮分外惹味，米芝蓮指南仲點名讚佢哋嘅燉湯添。此外，佢嘅招牌甜品蛋白杏仁茶都做得好出色，口感豐富之餘仲有美白功效，簡直係女士們嘅至愛。仲有一個秘密，利苑嘅鮮膶腸特別好味，入冬之後買番一斤喺屋企，好有安全感。
卓妮