花花世界之中，沒有人比女人更鍾意花，健康快車創會主席方黃吉雯（小吉）都係識花之士，尋日亮相沙田馬場拉頭馬，就以一襲藍白色蝴蝶圖案嘅法國著名品牌LEONARD亮相，小吉嫌周身蝴蝶未夠喉，喺肩膊再加多個別致蝴蝶襟針，莫非佢想變做花蝴蝶？
以繁花作設計圖案嘅LEONARD向來甚得名媛淑女歡心，小吉話買咗呢個品牌唔少裙，貪佢質料飄逸舒服唔易皺，出差唔使煩。
小吉尋日就以LEONARD套裙配貼身黑色西裝褸，走喺馬場婀娜多姿，再襯埋手上嗰鮮紅色手袋，十分搶眼。
LEONARD時裝不折不扣係高價貨，一條連身裙閒閒哋售五位數字，不過小吉都有唔少存貨，小吉笑騎騎唔認係富婆，話貴衫質料上乘，着多幾次乜都抵番晒，所以話呢，女人扮起靚上嚟，數口隨時叻過精算師！
卓妮