一班名人初次登陸南極，禦寒裝備夠晒睇頭。上周六夜晚九點半，一行十五位團友約埋搭夜機先飛抵南非，單係寄艙行李已幾十篋。容永祺話，一個月前已狂掃大批雪地防寒衣物及保暖包，領隊李樂詩出發前預告南極天氣正值夏天，溫度維持係零下十幾度，叫團友唔使太驚青。有極地專家傍到實，容永祺、王英偉、羅范椒芬及大型體育活動事務委員會主席胡曉明索性帶埋另一半探險，四Pair夫婦朝夕相對十八日，點打發時間好呢？

羅太老公出發前專登用四千幾蚊買咗部Canon相機，一於追住啲企鵝、海獅及海狗影靚相，其他團友亦落力刨南極生態書籍，免得考察時頭岳岳。遠征南極路途遙遠，容永祺話，各人要先坐飛機抵達南非再轉機往阿根廷，抵埗後逗留兩日抖順條氣，再飛往阿根廷南部一個城市坐船抵南極。計計數，由香港出發的話，起碼要四、五日後先登陸南極，咁轉折，卓妮都戥佢哋辛苦。

王英偉帶病上陣

王英偉出發前曾因工作太多，加上有感冒在身，曾諗過「縮沙」，但諗起畀咗十幾萬團費，終於披甲上陣，公子Jonathan都現身支持老竇，當晚抽空去送爸爸媽媽機。梗係喇，一生人有幸去一次南極，點計都值回票價。十八日後，呢十幾位南極勇士就會凱旋而歸，卓妮一於買定爆穀同花生，印印腳等聽第一手南極見聞。

卓妮