01/12/2009

播放本新聞相關短片

政情:鄭海泉妙答唔失禮

滙豐銀行主席鄭海泉尋日以「海港商界論壇」創會贊助人兼發言人身份,喺滙豐總行大廈開記者會,發表一份海港規劃嘅研究報告,呢期社會對海港發展都好關心,但「杜拜世界」財務危機當前,全場傳媒十居其九都係為財經問題而嚟。但同場仲有其他「海港商界論壇」代表,大部分都係外籍人士,要做到左右逢源,鄭大班都唔係無計。

記者會一開始已經講明先講番份研究,但問咗兩、三條問題,有財經記者按捺不住用廣東話問到杜拜危機,鄭海泉即刻以笑帶過,用英文答話:「我認為海港重要過財經好多。」將注意力轉番大會主題,又唔使令到在場外籍人士聽到一頭霧水,不過,鄭大班都好識做咁安撫記者,話「我一陣都會答財經問題」,令班記者行家唔使驚交唔到功課。