大閘蟹季節接近尾聲，想歎多幾啖蟹膏就要手快嘞。有立法會「蟹上王」之稱嘅象哥黃定光近日頻頻喺自己地頭「中出會所」，宴請高官及政界老友品嘗時令蟹，尋日輪到傳媒朋友。有肥蟹當前，女高官都放下身段，擦蟹勁過男高官添。
到底邊位官場中人咁擦得？象哥留一線，唔想指名道姓。據聞商務及經濟發展局局長劉吳惠蘭、政制及內地事務局局長林瑞麟及副局長黃靜文等人近日都去過「中出」歎蟹，象哥口中所講嘅擦得女高官，係指劉局長定黃副局長呢？大家自己估吓啦。
正所謂「食得是福」，女高官擦得唔係罪過，好似財爺曾俊華咁就無福消受，象哥笑言唔敢請鬍鬚曾嚟食蟹，事關大閘蟹出晒名膽固醇高，怕鬍鬚曾一時為食擦多幾隻蟹，隨時令心臟病復發喎。象哥就得天獨厚，近月日歎一隻蟹依然無有怕。佢話大閘蟹性質偏寒，只要食蟹後飲番杯用老薑、元肉及杞子炮製而成嘅「老薑茶」，食幾多都唔怕寒嘞！