本文重點
教育局局長孫明揚夫婦出晒名饞嘴，經常四處搵好嘢食，除咗香港會和灣仔富豪飯堂「福臨門」呢兩個必到食點外，原來仲經常幫襯金鐘「力寶軒」，最鍾意食該酒家嘅「石燒黃鱔飯」。究竟呢個鍋飯有乜特別呢？卓妮都好有興趣，仲搵該酒家嘅行政副總廚吳永昇傾過，佢話秘訣係先將生米與黃鱔分別蒸熟，然後用豆豉同薑葱一齊炒香，再放入燒紅咗嘅石鍋保溫，飯粒經過鑊炒後帶有黏性，咬感好好。
力寶軒炮製夠咬感
據講孫太由細到大都鍾意食黃鱔飯，既有益又補身，兩年前開始迷上力寶軒呢一味菜「石燒黃鱔飯」。由於孫家經常幫襯，已經同經理及大廚非常熟落，好多時大廚都會因應孫家嘅口味而調校菜式味道，而孫公夫婦在外間食肆發掘到新菜式，都會提議畀力寶軒，當正係孫家「御用廚房」。
不過，力寶軒經理陳子鋼就話，酒家對任何客人一視同仁，會盡能力順應客人要求更改菜式味道。
卓妮