嗱嗱嗱，話口未完，公立醫院又開錯刀啦。堪稱「庸醫奇譚」嘅醫管局最新一期《風險通報》又有奇聞怪事，其中最有創意嘅，就係「盲俠開刀法」。

有病人左手無名指生息肉，手指無法屈伸。Ａ醫生診斷過之後，話要做息肉切除手術，仲喺要開刀嘅地方畫埋圈。手術原因同位置都清清楚楚，唔會錯嘞啩，點知操刀嘅Ｂ醫生淨係問吓病人邊度有事，連病歷都冇睇清楚就開刀做「扳機指」手術。病人捱咗一刀至發現擺烏龍，要補做息肉切除手術，無辜捱多一刀。

有晒診斷紀錄，開刀位置寫到明，手術醫生居然「盲俠」上身，睇都唔睇就落刀，簡直係靠害。正如社區組織人士話齋，前線醫生如果跟足基本核對程序，根本唔會出錯，估計有人靠臨床經驗判斷病情，做漏基本程序至搞出咁大鑊。

除咗烏龍手術刀外，呢期《風險通報》同樣唔少得將病人當「人肉儲物櫃」嘅例牌個案。一位病人接受咗靜脈內抗生素注射，半年之後發燒入院，照肺嗰陣至發現，醫生上次打針留低咗一截導管，仲去到心臟入面，院方最終經大腿主動脈先至將導管攞番出嚟。

公立醫院真係好疏爽㗎，除咗打針送導管，仲有其他「小禮物」送添。嗱，幫病人做膝部膿瘡手術，送塊紗布喺傷口入面；用腹腔鏡切除盲腸，留低個金屬鉗內圈喺病人體內，呢啲都唔使另外收費㗎。

公立醫院咁大方，市民真係多得佢哋唔少咯，至弊送嘢隨時變成送命。有外科專家話，導管入心臟，有機會引起發炎，令細菌順住血管走勻全身造成昏迷以至死亡；紗布留喺傷口，輕嘅會令傷口無法愈合，嚴重嘅可能導致患處潰爛。己所不欲，勿施於人，醫院向病人「送禮物」，都係可免則免咯。

睇番以往嘅《風險通報》，開錯藥、剝錯牙、輸錯血、插錯喉、割錯器官，總之幾怪都有。醫療事故多數涉及人為因素，譬如工作馬虎、指引僵化、前線人手不足、工作負擔過重等等，但講到尾，都係醫管局管理混亂所致。

至弊由食衞局到醫管局，每次爆出醫療事故，班高官只會例行公事「檢討、建議」一輪，然後大事化小、小事化無，從來冇反躬自省，更加唔會負起應有責任。

《風險通報》兩個月出一期，烏龍事故一個月爆幾鑊，而且愈爆愈離譜，愈爆愈得人驚。唔怪得有人話，香港已經由天堂變成地獄，而且仲係第十八層地獄添，問你怕未！