培正中學今年踏入一百二十周年校慶，呢間名牌中文中學培育咗唔少社會精英，包括諾貝爾物理學獎得主崔琦。為咗呢個大日子，一班舊校友齊齊返嚟祝賀母校，包括一九五四年畢業的校友、科技大學創校校長吳家瑋。
時下唔少家長為求子女入讀名校，不惜孟母三遷，但原來呢種風氣，早於四、五十年代已經存在，當年讀緊中三嘅吳家瑋，原本居住港島區，只因為仰慕培正嘅校譽，舉家搬到九龍區，一直喺培正讀至中學畢業，前後讀咗三年。
現年七十二歲嘅吳家瑋，一大堆物理學碩士、博士銜頭，喺物理範疇表現出眾，但原來佢中學時係個文藝青年，最鍾意歷史，對理科反而無乜興趣，不時投稿去校報嘅學生園地，由《論道德》到新詩都寫，賺取每篇兩至三蚊嘅稿費，足以用嚟買蝦片等零食。吳校長話，當年文科生都被視為「搵唔到食」，所以佢最後都係揀咗讀理科，後來先發掘到自己對物理嘅興趣。