建造業係經濟寒暑表，老牌建築公司新昌營造尋日慶祝七十歲生日，政商界名人紛紛嚟飲番杯。集團主席朱樹豪（David）最矚目，帶同家中兩位博士級人馬——大公子朱鼎健（Ken）及千金朱嘉盈（Catherine）亮相，Ken朱年前獲母校加拿大西安大略大學頒授榮譽法學博士，細妹Catherine係英國倫敦經濟學院博士，近年返港打理家族生意。
身為執行董事嘅Catherine尋日同卓妮講開，原來佢已經懷有身孕六個幾月，但呢胎係男係女就未知，初為人母，Catherine話心情好緊張。尋日酒會上，發展局局長林鄭月娥、行政會議召集人梁振英、立法會議員林健鋒同陳茂波（Paul）、前高官葉澍堃等都畀面到賀，當然唔少得集團常務副主席王英偉及前大股東葉謀遵。
原來林健鋒係該集團獨立非執董，而阿Pau1八四年就已經加入，專門負責中國開發投資項目，足迹遍及北京、天津、大連等地，佢笑言當年自己返內地做嘢最驚就係坐內陸機，為保住條命仔寧願捱長途火車。