手提電話呢件高科技產品，又搞到多一個政府高官出醜，今次主角係上任無耐嘅運輸署署長黎以德。話說佢尋日去立法會開會傾小巴、巴士安全問題，正當議員追問運輸署點樣改善司機休息時間之際，會議廳內忽然有手機鈴聲響起，當大家估緊邊個咁唔生性、入嚟開會都唔熄機或者轉用震機，發緊言嘅黎署長突然停下來，原來「真兇」係署長！
黎署長眼明手快㩒停部機，點知講唔夠幾句，手機又響過，原來署長只係㩒停一下，無熄到部手機，對面位仁兄又唔生性，急住要搵署長，於是乎成場人望實署長。黎以德惟有低頭「搞機」，好尷尬咁話：「等我熄咗佢。」不過唔知係咪愈急愈亂，足足十幾廿秒先搞得掂。王國興即時笑佢，話要主席補番啲答問題秒數咁話；長毛仲勁寸署長話，連手機都管唔掂，又點管巴士公司？
記得年前煲呔曾喺內地與時任雲南省長徐榮凱會面時，手機突然響起，仲係雙響炮連響兩次，煲呔曾當時賴係推銷電話。今次署長畀手機整蠱，之後連對唔住都無同議員講，唔知邊個咁大整蠱呢？