劉太做稅務局揸fit人逾七年，期間都算幾好彩，連官場中人都話佢腳頭好，一來喺佢任內庫房幾次退稅，去年稅收更加有二千零七億元，比起六十年前稅務局成立時暴升一萬四千倍，變咗「吸水局長」。

劉太睇淡經濟難復甦

不過金融海嘯冚過嚟，劉太早前都話去年度市民同企業一共拖欠庫房超過七十二億元稅收，實際金額仲打破歷年紀錄，佢仲有啲睇淡今年經濟難復甦添！聽佢口氣，睇怕出年追稅都唔係咁樂觀。

班政府高官呢幾個月係咁唱好經濟見曙光，原來金融海嘯陰霾未散，近日仲爆出杜拜國際債務爆煲，恒指尋日直插逾千點，大家都擔心第二次金融海嘯殺到。

若果杜拜真係唔掂，咁全球經濟連帶香港都可能受到不同程度影響，唔知即將上任嘅朱鑫源會唔會變咗黑仔局長？