泛民呢場「救甘騷」，可追溯至十月初，立法會當值議員收到投訴，即建議將事件交議員個人利益監察委員會跟進。建制派梗係舉腳贊成啦，明知要判「潮州甘」死刑，難度極高，調查完鬧一輪，令「潮州甘」同民主黨面目無光，來得仲實際。不過，當時公文袋吳靄儀極力反對，指利監會只查工作開支津貼等投訴，不宜擴權，反而要求啟動最嚴厲嘅譴責調查機制，跟住泛民順水推舟，一唱一和咁焗Miriam負起提動議重責。

譴責動議一旦獲三分之二議員通過，「潮州甘」就會喪失議員資格，泛民表面夾手夾腳推「潮州甘」上斷頭台，不過，當時民建聯劉江華已經即場踢爆，質疑呢條只係泛民置死地而後生嘅舊橋，將甘乃威「高高舉起，輕輕放低」。果然，泛民尋日終於露出佢哋嘅真面目。

藉口女事主不願助查

Miriam尋日喺內會知會於十二月九日提譴責動議，吳靄儀同李卓人等群起提出，以女事主不願協助調查同罪證不足以令「潮州甘」辭職為由，要求撤回動議，真係人又係佢哋，鬼又係佢哋，Miriam畀佢哋玩到陀陀擰。建制派內嘅劉江華同葉劉淑儀則力挺Miriam，指咁做對Miriam唔公道。不過，始終雙拳難敵泛民眾手，泛民人多聲大，睬你都傻，泛民會後表明將喺十二月九日提出取消譴責嘅動議，一向喜歡搞局嘅「法律超人」謝偉俊亦預告會提同樣議案，咁即係話，泛民連環兩次擺咗Miriam上枱。

泛民為求「救甘」，不擇手段，Miriam提完譴責甘乃威動議之後，係咪應該考慮再提另一個譴責動議，譴責泛民罔顧道義呢？