本文重點
仲有個多月就到二○一○年，轉眼又一年，旅發局主席田北俊為香港推廣旅遊愈做愈起勁，今年聖誕終於可以休息一下，同好多港人一樣飛去日本朝聖，過一個白色聖誕。田少話今次揀咗去北海道，預備「拆禮物日」起飛，但只玩得三日，事關要趕返嚟主持除夕倒數，佢仲話今次主要去滑雪，唔係為自己，而係為個孫做先頭部隊，去滑雪場打探一下啱唔啱細路仔玩，因為佢想同個孫農曆新年再去，享受吓爺孫樂。
澳元買馬「有賺」
講到今年難忘事，鍾意玩吓馬仔嘅田少話，四月嗰陣飛咗去澳洲買兩隻馬，當時澳元疲弱，兌港紙只得五點六元，買隻馬仔平均三、四十萬澳元就有交易，比起○八年時已經平咗三成；點知近日睇番匯率，澳元兌港元升到七元，雖然隻馬未操又未出賽，唔知跑成點，但帳面已經賺咗，又一次證明田少投資有道。不過田少話，之前啲馬叫親乜乜武士，成績都一般，其中一隻兩歲新馬明年一月就會落船運港，難怪佢話改名都好頭痛。
講番田少尋日都好忙，先同記者講今年冬日節活動，之後就去撐長實「1881」聖誕樹亮燈儀式，跟住就拿拿臨過去對面嘅尖沙咀文化中心，原來係秘書Lily結婚之喜，田少舉家到賀，包括太太及子女都到場，呢個老細都算唔話得！
卓妮