本文重點
杜拜國營投資公司杜拜世界早兩日宣布押後償還債項半年，消息一出，尋日香港股巿當堂好似食咗瀉藥咁下跌過千點，有份借錢畀杜拜嘅滙控更首當其衝下跌至八十七元，莫非金管局前總裁任志剛在任時講嘅金融海嘯第二波真係開口中？不過，好多商界名人唔覺得係第二波，最多只係海嘯餘波，起碼滙控亞太區主席鄭海泉仲識講笑。
卓妮尋日見鄭大班夫婦約咗一位銀行家到香港會食晏，面對杜拜世界出事，鄭大班都話唔識睇，仲笑笑口話：「再講一陣連飯都無胃口食呀！」呢個時候仲識講笑，唔通今次杜拜拖債問題不大？不過，同樣到香港會食飯嘅滙控亞太區行政總裁王冬勝就無咁老定，話滙控仲未完全掌握杜拜嗰邊發生乜嘢事，要睇定啲先喎。
王英偉冇喺當地投資
新昌營造集團常務副主席王英偉（Wilfred）尋日出席公司酒會時都話，杜拜世界財困已流傳咗一段時間，相信係發展得太急導致形成泡沫，但不能以偏概全話整個中東都有問題，好似沙特阿拉伯發展相對穩定。
有搞基金嘅Wilfred喺中東都有投資，但杜拜就無，所以未有影響；不過佢都呼籲投資者小心，事關股市調整未必會一日完成晒，後市升升跌跌都唔出奇。
中華廠商聯合會候任會長黃友嘉係美國芝加哥大學嘅經濟學博士，佢話杜拜世界拖債正好話畀大家聽勿以為全球經濟已經復甦，仍有機會出現波動，但都同意未至於構成金融海嘯第二波。
卓妮