煲呔曾嘅曾朋友、行政會議成員楊敏德尋日獲煲呔曾任命，接任前行政會議成員羅仲榮做理工大學校董會主席，出年一月一日起生效，任期三年。現任行會非官守成員當中，梁智鴻掌港大、張建東掌科大、梁振英就管城大，李業廣都係啱啱卸任嘅公開大學校董會主席，話煲呔曾唔係「親人善任」都唔信。不過曾朋友做大學校董會主席，楊敏德係第一人。
其實楊敏德同煲呔曾交情深厚。早喺○一年，當時仲做緊財政司司長嘅煲呔曾帶商界代表去大西北訪問，其中一個團友就係做紡織同製衣生意嘅楊敏德。當時煲呔曾喺新疆見到楊敏德嘅棉花田開得好，仲封楊敏德做「棉花公主」添！煲呔曾將楊敏德招攬入行會，上個月曾朋友幫煲呔曾夫婦慶祝結婚四十周年嘅秘密飯局，煲呔曾夫婦臨時甩底，楊敏德都依然盛裝出席，成為曾朋友之一員。依家佢做埋理大校董會主席，既要打理家族生意，仲孭住四項公職喺身，楊敏德為煲呔曾兩脇插刀咁幫手，曾朋友果然係真朋友。