有「光纖之父」之稱嘅高錕獲頒諾貝爾物理學獎，引發全城「高錕熱」，人人戥佢開心之餘，睇完佢同太太嘅溫馨生活片段更無一不被感動。早幾日高錕嘅太太黃美芸低調返港，尋日出席一個退休教工晚會時更首次面對香港傳媒，感謝港人一直對高校長嘅支持。
今次黃美芸隻身返港，原來係為咗探吓一班舊朋友兼舊同事，佢話如果同埋高校長一齊返嚟可能唔係好方便。留番患有老人癡呆症嘅高校長自己一個喺美國，黃美芸叫大家放心，事關高校長身邊有好錫佢嘅仔女照顧，仲話自己都有打電話返去問吓丈夫點，「佢（高校長）身體其實唔差㗎，係記憶力唔好啫。」
問到黃美芸對於十二月十日舉行嘅諾貝爾頒獎禮準備成點，佢就話當日着嘅旗袍已經準備好，致謝辭亦都寫得七七八八，但就話內容要保持神秘，到時先揭曉喎，現階段亦都仲未決定到時係由高校長自己致謝辭定由佢代講。頒獎禮臨近，黃美芸話丈夫開心之餘亦都唔算好緊張，「高校長四十年來已經拎咗好多獎㗎啦，係呢個特別啲啫。」