無論甚麼場合，總有啲酒點綴吓。中環人唔少都喜歡杯中物，鏞記老闆甘健成仲話日日都要飲人稱「雀仔威」嘅蘇格蘭威士忌Famous Grouse，唔飲唔舒服。甘老闆又同卓妮分享佢嘅獨門秘方，話可以睇天氣決定飲法：夏天加冰，冬天配茶，實行順四季養生。
不過望吓甘老闆支雀仔威，發覺同其他有啲唔同，事關酒瓶嘅招紙上寫住佢「KINSEN KAM」嘅大名。原來支酒有段故，甘老闆，成日落舖面同客人傾偈，年幾前佢見到班外國人喺鏞記食飯，傾落覺得啱嘴形，就主動送咗支雀仔威畀佢哋。點知過咗一排，佢竟然收到兩箱寫住「FAMOUS KINSEN KAM」嘅雀仔威，先知道當日個客原來係雀仔威嘅高層。世界名酒寫住自己個名，甘老闆呢支雀仔威真係威晒囉！
卓妮