勞力士一向係身份嘅象徵，時至今日，勞力士仍然係腕錶愛好嘅心頭好，勞力士嘅Daytona，就更加係名錶中嘅名錶，一直深受富豪以至富豪二代嘅歡迎，莊士集團太子爺莊家彬（Albert）見過無數名錶，都係對Daytona情有獨鍾。
Daytona前身係勞力士一九三七年推出嘅計時碼錶系列，用Valjoux機芯，但當時寂寂無聞。直至六十年代勞力士將Daytona改革，加入可測試平均圈速嘅錶圈設計，隨即大受賽車手歡迎，盛傳Daytona個名，靈感係來自美國賽車勝地Daytona Beach。
Daytona每年有限定產量，每個地方嘅專賣店一個月只係分到幾隻Daytona名額，所以唔少舖頭都會留畀熟客，令Daytona求過於供，有時要排隊排幾年先買到一隻。
早前卓妮喺中環一間酒店門外，撞到一身便服打扮嘅Albert，咁啱見到佢戴住Daytona，而且仲係白金鑽石限量版嗰款，市價起碼要三十萬，細問之下原來係佢爹哋兩、三年前買畀佢。Albert話，如果無記錯，應該係爹哋兩、三年前喺杜拜買畀佢。其實幾年前Albert喺美國讀完書返嚟，爸爸已經買咗隻Daytona畀佢，不過係普通嗰款，所以呢隻已經唔係佢第一隻Daytona啦！
卓妮