更加醜陋嘅係，原來成個無聊遊戲係淫賤黎夥拍李漢奸幕後擺布，仲要夾硬逼人上轎。民主黨元老司徒華踢爆，淫賤黎呀，李漢奸呀，陳方安生呀，李鵬飛呀，三男一女兩個幾月前設下神秘飯局，四人幫一致表明支持五區總辭，集體游說堅持反對嘅司徒華站在同一陣線。

喂，只要智商稍為正常少少，梗係反對五區總辭呢個自殺式方案啦，司徒華絕對政治正確。好嘞，人哋既然反對，四人幫點解係都要逼人轉軚先？司徒華講得冇錯，李漢奸唔識政治。

奇則奇在，經過司徒華當頭棒喝，李漢奸又改口風縮沙咯喎，又話要對五區總辭「停一停、諗一諗」，而且承認自己想法天真，認錯咁話。

唉，計功夫茶話齋，如果李漢奸係太傻太天真，最大嗰隻幕後黑手一定係淫賤黎。你知啦，淫賤黎唯恐天下不亂，永遠有破壞冇建設，佢話之你係唔係有輸冇贏吖，佢理得你會唔會損手爛腳吖，總之佢推你一頭撞埋牆去死，佢擔櫈仔食爆谷睇好戲。

成日都話政治係最污糟邋遢嘅，偏偏淫賤黎樂此不疲。呢個逐臭之夫除咗一手搞政治，另一隻手仲有特殊癖好，就係誨淫誨盜。呢嗱嗱嗱，壹淫媒又犯眾怒喇，喺台灣推出虛擬動畫新聞，叫做「動新聞」喎，其實係掛羊頭賣狗肉，以電腦動畫包裝腥色羶，例如繪影繪聲重演獸父姦女，一來惡心到極，二來對於受害者簡直係傷口灑鹽。一味宣揚色情暴力，卒之激起社會公憤，幾十個婦女團體同埋監察傳媒組織齊齊操去台灣壹淫媒總部抗議。

話時話，人哋台北政府夠晒果斷，唔似香港政府百擒百縱。台北市長郝龍斌宣布，向台灣壹淫媒懲處最高罰則，罰款五十萬元新台幣。人稱「郝青天」嘅郝市長仲話，「動新聞」嚴重影響青少年身心發展，違反兒童及少年福利法，必須嚴厲懲罰，如有再犯，必將再罰。

你睇你睇，咁先至係波吖嘛，身為維護百姓福祉嘅政府，有乜理由任得壹淫媒荼毒青少年？反觀香港咯喎，有恃無恐嘅淫賤黎得到港英餘孽包庇縱容，違反《淫褻及不雅物品管制條例》過百次㗎喇，案底厚過電話簿，居然餐餐都係輕判了事。

台灣就話有個現代包拯郝龍斌啫，香港幾時先至有青天大老爺？幾時先至有人出手嚴懲誨淫誨盜破壞王？正義傳媒幾時先至可以撥亂反正，不再受到選擇性針對？惡有善報，善有惡報，是非顛倒，黑白不分，香港何日見青天！