立法會行政管理委員會今日就要通過立法會新大樓嘅室內設計圖，所以尋日特登將設計圖同用料樣辦擺晒出嚟畀議員記者參觀，議員葉劉淑儀同埋王國興一齊去睇。心繫基層嘅王國興就留意新大樓間餐廳坐到幾多人、樓梯安唔安全，同埋議員夠唔夠房用。
素來形象前衞嘅立法會議員葉劉淑儀參觀圖則時，突然問起有無搵過風水師睇睇個設計同布局，佢話其實佢唔信邪，只係佢以前做過嘅紀律部隊相信，為求安心啫！葉太又對將來新大樓有健身室好滿意，事關開完馬拉松式會議後有地方畀佢伸展吓。
至於視立法會為家嘅立法會秘書長吳文華就話，佢理解記者關注點樣捉到班議員，原來議員都好關注點樣畀記者捉到，所以特意做咗啲小改動方便記者。此外，大約今年聖誕節前就有議員辦公室、記者室設備嘅示範單位畀大家睇，而且立法會仲會問政府攞番同以往立法局有關嘅文物，將來擺喺新大樓畀市民參觀。