立法會議員陳克勤早前甜蜜地拖實女朋友，喺立法會主席嘅婚禮上亮相，女友雖然面對鏡頭時表現得相當怕醜，但笑容可掬，樣子甜美，令人眼前一亮。原來克勤仔喺十年前仲係做緊區議員時，喺一個社區活動上邂逅現時從事金融業嘅女友。克勤仔一再強調佢女友當時只係幫手做義工，唔係佢嘅議員助理，莫非驚畀人聯想起甘威嘅「有好感」事件？
克勤仔話對理財方面一竅不通，所以有個從事金融業嘅女友啱晒佢喎，事關可以將理財問題畀晒女友幫佢搞。佢笑言唔知女友搵幾多錢，分分鐘搵得多過佢都唔定，但就話自己係傳統中國男人，會養妻活兒咁話。
問到佢哋幾時結束九年愛情長跑，克勤仔就話上星期六去完一個婚禮後，見到新郎又唱又跳又演講，覺得好大壓力，好擔心自己冇咁好才藝，結婚時惟有表演跳火圈同吞劍娛賓喎，咁大家就真係要拭目以待喇！