下任中華廠商會聯合會會長前晚順利誕生，廠商會名譽會長黃保欣之子，身為大贏家嘅候任會長黃友嘉（David）當然好高興，選舉過後，當晚即刻拉埋成班兄弟去馬車會慶功，仲自掏腰包筵開六、七席，盡興豪飲十支十年金裝茅台同埋廿幾支紅酒，唔知David有無醉倒呢？
前晚為David祝捷嘅足足有七、八十人，包括副會長林大輝、施榮懷、倪錦輝同會董吳永嘉等。林大輝話，前晚成班人食到十二點先捨得走，席間當然唔少得食翅，仲有螺片同臘味飯等，都幾啱依家寒冷嘅天氣。再加埋十支茅台、廿幾支紅酒，所以唔少人都飲到high晒！
大家咁高興，唔知身為主人家嘅David有無被「隊」到醉倒當場呢？大輝話，David嘅酒量唔係咁差，即使唔係頂尖高手，都必定喺高手之列，所以前晚David無飲醉，不過大輝就牙擦擦話，講酒膽，佢就叻過David，但講酒量就未必啦，佢都好謙噃！難得David贏得咁漂亮，開心番一晚又何妨呢！